Господи, Иисусе Христе, Боже наш! Ты - сирых хранитель, скорбящих прибежище и плачущих утешитель. Прибегаю к Тебе аз, сирый, стеня и плача, и молюся Тебе: услыши моление мое и не отврати лица Твоего от воздыханий сердца моего и от слез очей моих. Молюся Тебе, милосердный Господи, утоли скорбь мою о разлучении с родившими и воспитавшими мя родителями моими (имена); души же их, яко отшедших к Тебе с истинною верою в Тя, твердою надеждою на Твое человеколюбие и милость, приими в Царствие Твое Небесное. Поклоняюся пред Твоею святою волею, еюже отъяты бысть у мене, и прошу Тя, не отыми точию от них милости и благосердия Твоего. Вем, Господи, яко Ты, Судия мира сего, грехи и нечестия отцев наказуеши в детях, внуках и правнуках даже до третьяго и четвертаго рода, но и милуеши отцев за молитвы и добродетели чад их, внуков и правнуков. С сокрушением и умилением сердца молю Тя, милостивый Судие, не наказуй вечным наказанием усопших незабвенных для меня рабов Твоих, родителей моих (имена), но отпусти им вся согрешения их вольная и невольная, словом и делом, ведением и неведением сотворенная ими в житии их зде на земле, и по милосердию и человеколюбию Твоему, молитв ради Пречистыя Богородицы и всех святых, помилуй их и вечныя муки избави. Ты, милосердный Отче отцев и чад, даруй мне, во вся дни жизни моея, до последнего издыхания моего, не преставати памятовати о усопших родителях моих в молитвах своих, и умоляти Тя, праведнаго Судию, да вчиниши их в месте светле, в месте прохладне и в месте покойне, со всеми святыми, отнюду же отбеже всяка болезнь, печаль и воздыхание. Милостиве Господи! прими днесь о рабах Твоих (имена), теплую молитву мою сию и воздай им воздаянием Твоим за труды и попечения воспитания моего в вере и христианском благочестии, яко научившим мя первее всего ведети Тя, своего Господа, в благоговении молитися Тебе, на Тебе единаго уповати в бедах, скорбех и болезнех и хранити заповеди Твоя; за благопопечение их о моем духовном преуспеянии, за приносимыи ими о мне моления пред Тобою и за все дары, ими испрошенные мне от Тебе, воздай им Своею милостию, Своими небесными благами и радостями в вечном Царствии Твоем. Ты бо еси Бог милостей и щедрот и человеколюбия, Ты покой и радость верных рабов Твоих, и Тебе славу возсылаем со Отцем и Святым Духом, и ныне, и присно, и во веки веков. Аминь.
